2025 жылғы 27 ақпанда ORTA Community алаңында MIND-Talks аясындағы жаңа кездесу өтті. Ол қоғамдағы сыбайлас жемқорлық және оның қабылдануы мәселелеріне арналды. Дәрісті MNU жанындағы MIND орталығының әлеуметтік зерттеулер бағдарламасының жетекшісі Родионов А.Н. жүргізді.
Талқылаудың негізгі тақырыптары:
- Сыбайлас жемқорлықты жасыру тетіктері қалай жұмыс істейді және оған қатысушылар қандай стратегияларды қолданады?
- Неліктен кейбір схемалар «қалыпты» құбылыс ретінде қабылданып, қоғам тарапынан айыпталмайды?
- Қазақстандықтар сыбайлас жемқорлық үлгілерін қаншалықты тиімді танып біледі?
Қатысушылар тек аналитикалық шолуды тыңдап қана қоймай, сонымен қатар нақты кейстерді талқылап, заңды үдерістерді сыбайлас жемқорлықтық айла-шарғылардан қалай ажыратуға болатынын қарастырды.
MIND-Talks жалғасуда! Келесі кездесулерімізді жіберіп алмаңыздар, өзекті тақырыптарды бірге талқылауға қосылыңыздар.
2025 жылғы 20 ақпанда Maqsut Narikbayev University-де Сенаттың Конституциялық заңнама, сот жүйесі және құқық қорғау органдары жөніндегі комитетінің көшпелі отырысы өтті. Оған Сенат Төрағасының орынбасары Жақып Асанов жетекшілік етті. Негізгі талқыланған тақырып – құқықтық актілердің оқылымдылығын бағалау құралдары және олардың заң шығару үдерісін жетілдірудегі рөлі болды.
Отырыста MIND Қолданбалы ғылыми-талдау орталығының социологиялық зерттеулер департаментінің басшысы Дмитрий Серебренников нормативтік құқықтық актілерді сандық талдау әдістерін таныстырды. Ол мәтін күрделілігін объективті көрсеткіштермен өлшеудің және заңнамалық құжаттардың оқылымдылығын бағалаудың бірыңғай стандарттарын әзірлеудің қажеттілігін атап өтті. Сонымен қатар, Maqsut Narikbayev University Жоғары құқық мектебінің директоры Ольга Бектибаева және Жоғары құқық мектебінің қауымдастырылған профессоры Антон Дидикин нормативтік құқықтық актілердің оқылымдылығын арттыруға арналған әдістемелік ұсынымдар ұсынды.
Мәтінді талдаудың автоматтандырылған құралдары нормативтік актілердің сапасын айтарлықтай арттыруға, оларды заңгерлер мен азаматтар үшін қабылдауды жеңілдетуге, сондай-ақ халықтың құқықтық сауаттылығын көтеруге ықпал ете алады. Ғылыми зерттеулерді, технологиялық инновацияларды және заңнамалық бастамаларды біріктіретін кешенді тәсіл қолжетімді заңнаманы қалыптастырудағы негізгі элементке айналады.
Талқылаудың қорытындылары парламенттік тыңдауларға дайындық барысында және Үкіметке арналған ұсынымдарды әзірлеу кезінде ескерілетін болады.
2024 жылғы 7 қазанда Maqsut Narikbayev University-де Labour Law Days аясында Еңбек құқығы ғылыми мектебі MIND алаңында «Жасанды интеллект және өзге де цифрлық технологиялар дәуірінде еңбек саласын құқықтық реттеу тәсілдері» тақырыбында дөңгелек үстел өткізді.
Сарапшылар келесі негізгі тақырыптарды талқылады:
- Жасанды интеллектіні заң шығару процесі тұрғысынан құқықтық реттеу: заңнамадағы өзгерістер еңбек саласын жаңа технологияларға қалай бейімдей алады және еңбек нарығы субъектілері нені тәуекел ретінде ескеруі тиіс;
- Автоматтандыру мен ЖИ енгізілуіне байланысты еңбек құқығы үшін негізгі сын-қатерлер, оның ішінде қызметкерлерге арналған «ақылды арнайы киім» секілді технологиялар;
- IT-технологияларды пайдалану арқылы әлеуметтік төлемдерді тағайындау рәсімін жетілдіру;
- Платформалық жұмыспен қамту контексінде ЖИ-дің еңбек құқығына әсері: ЖИ-ді реттеудегі халықаралық тәжірибе, платформалық жұмыспен қамту және Қазақстандағы осы саладағы құқықтық реттеу олқылықтары;
- Еңбек дауларын сотқа дейін және сотта шешуде медиация мен жасанды интеллектінің өзара байланысының өзекті мәселелері;
- Жасанды интеллектіні қолдануға байланысты қызметкерлер үшін еңбек заңнамасында кепілдіктерді қамтамасыз ету.
Дөңгелек үстел ашық пікірталаспен аяқталды. Онда қатысушылар ЕО-ның ЖИ-ді реттеу туралы регламенті және платформалардағы еңбек жағдайларын жақсарту жөніндегі директивасы сияқты халықаралық құқықтық бастамаларды талқылап, Қазақстандағы еңбек заңнамасының даму жолдарын тереңірек қарастырды.
